Agust Flygenring - semsagt.net

Insjallah

Eitt af því sem ég afrekaði í síðustu viku, fyrir utan að lesa/læra undir próf var að lesa bókina Insjallah eftir Jóhönnu Kristjónsdóttur. Bókin var á jóla-leslistanum hjá mér um síðustu jól en þá komst ég ekki yfir nema brot af listanum.
Hvað um það, bókin er einskonar dagbók sem Jóhanna skrifar meðan hún dvelur fyrst í Kairó í Egyptalandi veturinn '95-'96 og svo í Damaskus í Sýrlandi veturinn '98-'99. Þetta er ekki aðeins dagbók sem segir frá daglegu lífi og upplifun í þessum stóru borgum Araba, heldur koma skoðanir Jóhönnu á málefnum Mið-Austurlanda skýrlega í ljós. Dagbókin er ekki dagleg dagbók (einsog margar bloggsíður) heldur líða oft 2-3 vikur á milli færslna en þá segir hún frá markverðustu upplifunum sínum síðustu daga.
Sérstaklega þótti mér skemmtilegar frásagnir af upplifun hennar á tilhugalífi Araba og svo hvernig upplifun það er að búa í Sýrlandi og hafa njósnara á eftir sér alla daga. Að upplifa muninn á þessum tveimur samfélögum í gegnum bókina er mjög intresant.
Bókin er stórskemmtieg fyrir þá sem hafa áhuga á þessum menningarheimi. Þeir sem hafa engan áhuga á honum munu hafa mun minna gaman að lestrinum. Mér fannst bókin bæði áhugaverð og skemmtileg. Jóhanna skrifar skemmtilegan texta og bókin er mjög auðlesin. Ég las hana á þremur kvöldum. Bók sem þeir sem hafa áhuga á þessum heimshluta verða ekki fyrir vonbrigðum með.
Agust skrifaði 17.12.02 02:55

Flokkun: Menning