Agust Flygenring - semsagt.net

Tölvur á mínum grunnskólaárum

Þessi færsla Stebba Páls rifjaði upp fyrir mér eftirfarandi, sem ég setti í komment við færsluna.
_ _ _ _ _ _ _ _ _ _ _

Í fátækum sveitaskólum Hafnarfjarðar voru keyptir Makkar, líkt og í öðrum skólum. Þetta hefur líklegast verið í kringum 1990. Þeir voru að mestu ónothæfir og aldrei bauðst mér t.a.m. tölvukennsla öll þau ár sem ég var í skólanum. Nema hvað mig minnir að það hafi verið val í 9. eða 10. bekk en þar sem þessi tölvukennsla var svo mikið djók þá valdi nánast enginn það.

Þeir sem áttu ekki tölvu heima gátu fengið að skrifa ritgerðir í tölvuveri skólans - og var það líklegast það eina sem blessaðar tölvurnar voru nothæfar í - á mörkunum þó. Ég man að skársta ritvinnsluforritið var (C)1986 (þetta hefur líklegast verið veturinn 94/95).

Úr þessu var svo bætt að mér skilst '98 eða '99 og var þá tekið í notkun nýtt tölvuver. Veit samt ekki hvort að þá hafi vélritunarkennsla á ritvélar verið lögð niður en þegar ég valdi vélritun í vali fékk maður að glamra á forláta rafmagnsritvél. Nokkrar voru með innbyggðum "leiðréttara" og var slegist um þær í upphafi hvers tíma. Mest allur tíminn í vélritunarkennslunni fór í að telja út miðjujöfnun á forsíður og annað slíkt. Minnir einhvern veginn að það hafi verið 44 slög á blaðsíðunni og Ágúst Flygenring var því skrifað frá og með 15. slagi.

Eftir heilan vetur kunni ég ekki rassgat í fingrasetningu en hamraði þess í stað nokkuð hratt með puttaaðferðinni, enda með tölvu heima frá og með fermingu. Kosturinn var hinsvegar sá að í 10. bekk fékk alltaf hraðferðarbekkurinn vélritunarstofuna (sem var venjuleg stofa með lítilli kompu þar sem ritvélarnar voru geymdar) og fékk maður því að sitja á "hjólastólum" allan síðasta veturinn. Það var líklegast mesta umbunin sem maður fékk fyrir dugnað í grunnskóla.
Agust skrifaði 06.02.04 11:42

Flokkun: Daglegt líf , Tækni&tól